Հայկական մարզաշխարհում կրկին տոն է. սամբոյի հերթական նվաճումն արձանագրվեց շնորհիվ արցախցի մարզիկ Արման Ավանեսյանի:
Արման Ավանեսյանը ծնվել է 1999թ. դեկտեմբերի 24-ին Արցախում: 8 տարեկանից հաճախել է ձյուդոյի մարզումների վաստակավոր մարզիչ Իվան Ազիզբեկյանի մոտ: Ձյուդոյում լավ արդյունք է ցուցաբերել, ինչն էլ լավ հիմք է հանդիսացել հետագա տարիներին իր ուժերը փորձելու նաեւ մարտական սամբոյում: Տաղանդավոր մարզիկը հաջողություն է ունեցել նաեւ մարտական սամբո մարզաձեւում:
2025թ. օգոստոսի 13-14-ը Չինաստանի Չենգդու քաղաքում կայացած «Աշխարհի խաղեր -2025» մրցաշարում 98 կգ քաշային կարգում Արման Ավանեսյանը մարտական սամբո մարզաձեւում դարձավ չեմպիոն:
– Արման, նախ շնորհավորում ենք հաղթանակի առթիվ: Հե՞շտ էր մրցակիցներին հաղթելը:
– Շնորհակալություն: Նախ նշեմ, որ այս մասշտաբով կազմակերպվող մրցաշարերին կարող են մասնակցել միայն վարկանշավոր մարզիկներ: Պետք է նշել, որ չեմպիոնի կոչման համար պայքարում էին իսկապես ուժեղ, տիտղոսակիր մարզիկներ: Առաջին մարտը ուկրաինացի աշխարհի կրկնակի չեմպիոն մարզիկի հետ էր: Նրան հաղթելուց հետո կիսաեզրափակչում հանդիպեցի կամերունցի մարզիկի, իսկ եզրափակչում՝ ռուս տիտղոսակիր մարզիկի, որին պարտվել էի նախորդ մրցաշարերին, բայց այս անգամ կարողացա հաղթել նրան ու հռչակվել չեմպիոն: Հաղթանակին հասնելու ճանապարհը չի կարելի հեշտ անվանել, բայց փաստն այն է, որ երկար ու նպատակասլաց մարզումները տալիս են իրենց արդյունքը, ինչին պետք է մշտապես ձգտել:
– Ձյուդո մարզաձեւով պարապած լինելը բավարա՞ր է մարտական սամբոյում հաղթելու համար:
– Միայն ձյուդոյի մարզումները բավարար չեն, բայց ձյուդոն կարող է լավ հիմք տալ հետագայում նաեւ 3-4 տարի հարվածային տեխնիկա սովորելով՝ սամբոյում լավ արդյունքի հասնելու համար: 8 տարեկանից պարապել եմ ձյուդո: 2020թ. սկսել եմ զբաղվել սամբո մարզաձեւով, 2022թ.՝ մարտական սամբոյով:
– Ձեր ունեցած բազմաթիվ մարզական նվաճումներից որո՞նք եք առանձնացնում:
– Սպորտում ցանկացած նվաճում կարելի է առանձնացնել որպես փորձի ավելացման եւ նոր ձեռքբերման օրինակ: 2023թ. մարտական սամբոյի Եվրոպայի չեմպիոն եմ դարձել, Աշխարհի առաջնությունում՝ երրորդ տեղի մրցանակակիր: 2024 թ. Եվրոպայի առաջնության երկրորդ, իսկ Աշխարհի՝ երրորդ տեղի մրցանակակիր եմ: 2025թ. դարձել եմ Եվրոպայի չեմպիոն, Համազգային խաղերի չեմպիոն, Աշխարհի գավաթի արծաթե մեդալակիր: Ձյուդոյի ՀՀ 5-ակի չեմպիոն եմ, Ձյուդոյի Հայաստանի սպորտի վարպետ, մարտական սամբոյի միջազգային սպորտի վարպետ: Ուզում եմ շնորհակալություն հայտնել իմ բոլոր մարզիչներին, ֆիզիկականի մարզիչ Արթուր Նժդեհին, բոլոր նրանց, ովքեր ներդրում ունեն իմ հաղթանակների հասնելու ճանապարհին:
– Առաջիկայում ի՞նչ անելիքներ ունեք:
– Պատրաստվում եմ մասնակցել սեպտեմբերի 13-ին Երեւանում կայանալիք պրոֆեսիոնալ Խառը մենամարտերի MIX FIGHT 58-րդ միջազգային մրցաշարին: Նոյեմբերին կմասնակցեմ մարտական սամբոյի աշխարհի առաջնությանը:
Սոնյա ԱՎԱԳՅԱՆ