Ձեզանից յուրաքանչյուրը հավանաբար լսել է «ռեսուրսային վիճակ» հասկացության մասին: Դա այն վիճակն է, երբ մարդն ունի էներգիա այս կամ այն գործը կատարելու համար: Բայց երբ ռեսուրսները սպառման եզրին են, դրանք պետք է համալրել: Ցանկալի է դա կատարել նախապես. այդ դեպքում միշտ կունենաք լավ տրամադրություն, աշխատունակություն, ուրիշներին օգնելու ցանկություն: Որտեղի՞ց գտնել ուժ, ո՞ր մթերքներն են էներգիա տալիս եւ էներգիայի ուրիշ ի՞նչ աղբյուրներ գոյություն ունեն:
Բժշկի ընդունելության ժամանակ այցելուները հաճախ են հնչեցնում հետեւյալ եւ նման բողոքներ. «ես ուժ չունեմ», «էներգիաս զրոյի վրա է», «վերադառնում եմ տուն եւ հոգնածությունից ընկնում»: Այս վիճակները չի կարելի արհամարհել ոչ մի դեպքում: Նման բողոքները կարող են ազդարարել ֆիզիկական հիվանդությունների մասին, ընդ որում դրանք կարող են միանգամայն վտանգավոր լինել:
Բնականաբար բժիշկն այդ բողոքներով այցելողներին ուղարկում է հետազոտման: Շատ հաճախ պարզվում է, որ ընդհանուր առմամբ մարդն առողջ է, ոչ մի պաթոլոգիա չի վերհանվում, բայց այդ փաստն ինքնին էներգիա չի ավելացնում: Էներգիա ինչպես չկար, այնպես էլ շարունակում է չլինել:
Ի՞նչ անել: Պետք է ուշադրություն դարձնել կենսակերպին: «Մարած մարտկոցի» վիճակը փոխել կարելի է, եթե վերազննում անցկացնել էներգիայի հիմնական աղբյուրներում՝ ֆիզիկական, հոգեկան եւ էմոցիոնալ: Դա էլ է բավարար լինում էներգիան վերականգնելու եւ կյանքի ուրախությունը վերադարձնելու համար:
Ֆիզիկական էներգիա. սկզբում օգնեք մարմնին:
Ֆիզիկական կամ մարմնային էներգիան կապված է մեր օրգանիզմի ֆիզիկական վիճակի հետ: Այն պատասխանատու է մարդու աշխատունակության եւ կենսական ակտիվության համար: Իզուր չէ ասված՝ «Առողջ մարմնում՝ առողջ ոգի»: Եթե մարդն ունի ֆիզիկական էներգիայի պակաս, նա մշտապես զգում է հոգնածություն եւ քնկոտություն, կարող է ջրազրկվել եւ ունենալ հորմոնային խանգարումներ:
Օրգանիզմի էներգիան եւ աշխատունակությունը բարձրացնելու համար բավական է կանոնավորել քունը, սնունդը, հեղուկ խմելու ռեժիմը, ֆիզիկական ծանրաբեռնվածությունը: Կարեւոր է չմոռանալ աշխատանքի եւ հանգստի ռեժիմի մասին. ֆիզիկական էներգիայի բացակայության բողոքներ լսվում են նաեւ շատ մեծ ծանրաբեռնվածությամբ աշխատող մարդկանցից:
Երբ կազմում են էներգիայի բացակայությամբ տառապող մարդու սննդակարգը, հաշվի են առնում, որ սնունդը պետք է լինի բալանսավորված ոչ միայն սպիտակուցների, ճարպերի ու ածխաջրերի պարունակության առումով, այլեւ պետք է լրացնի բոլոր վիտամինների դեֆիցիտը: Դա արվում է նաեւ վիտամինների ու հավելուկների ընդունմամբ:
Այսպիսով՝ ի՞նչ է անհրաժեշտ օրգանիզմին, որպեսզի նա լինի մշտապես ռեսուրսային վիճակում:
Վիտամին A: Այն պատասխանում է լորձաթաղանթի վիճակի, մաշկի, տեսողության, իմունիտետի համար: Պարունակվում է գազարի, դդմի, պանրի, ձվի, լյարդի, ձկան մեջ:
B խմբի վիտամիններ: B1, B2, B6 վիտամիններն են, որ նպաստում են նյարդային համակարգի ամրացմանը եւ բարելավում են նյարդային իմպուլսի ընթացքը: Դրանցով հարուստ են լոբազգիները, խմորիչները, հացազգիները, գունավոր կաղամբը:
Վիտամին B8: Օգնում է դիմադրել սթրեսներին, բարելավում է արյան շրջանառությունը: Պարունակվում է պոպոկի, լոբազգիների, խմորիչների, ցիտրուսայինների մեջ:
Վիտամին C: Բարձրացնում է դիմադրողականությունը ինֆեկցիոն հիվանդությունների հանդեպ, ամրացնում է անոթների պատերը: Պարունակվում է մասուրի, թթու կաղամբի, հապալասի, կանաչ սոխի, ցիտրուսայինների մեջ:
Վիտամին H (բիոտին): Կարգավորում է նյութափոխանակության գործընթացներն օրգանիզմում: Պարունակվում է ձվի դեղնուցի, սոյայի, բրնձի մեջ:
Երկաթը պատասխանում է հյուսվածքների՝ թթվածնով եւ օգտակար նյութերով ապահովման համար: Ամենից շատ երկաթ պարունակվում է տավարի մսի եւ լյարդի մեջ: Կալցիումը բարելավում է ոսկորների, մազերի ու եղունգների վիճակը: Պարունակվում է կաթնաշոռի, պանրի, կաթնային մթերքների մեջ: Կալիումը նպաստում է նյարդային իմպուլսի ընթացքին: Կալիումով հարուստ են բանանը, ծիրանաչիրը, սալորաչիրը, եփած կարտոֆիլը, խուրման, լոբազգիները: Մագնիումը նպաստում է քնի կարգավորմանը, բարելավում է նյարդային համակարգի աշխատանքը: Պարունակվում է պոպոկի, արեւածաղկի, կաթնային մթերքների, կիտրոնի մեջ: Ցինկը պաշտպանում է նյարդային ծանրաբեռնվածությունից: Դրանով հարուստ են հնդկաձավարը, պոպոկը, ծովամթերքները, արեւածաղիկը, պանիրը, ձվի դեղնուցը:
Էմոցիոնալ էներգիա. կյանքը լցրեք վառ գույներով:
Մեր հույզերն արտացոլում են մեր արձագանքը շրջապատող աշխարհի նկատմամբ: Այն էներգիան, որը տալիս են մեզ մեր հույզերը, թույլ են տալիս մեզ առաջ շարժվել եւ շատ տեղերում որոշում են մեր հաջողությունը: Բայց ավաղ այդ ռեսուրսը կորցնելը շատ հեշտ է, եւ ներկայում առավել եւս առիթները դրա համար բավականին են:
– ուժեղ ցնցում, մտերիմ մարդու կորուստ, բնական աղետներ, դավաճանություն
– անորոշություն, ապագայի հանդեպ հույսի բացակայություն
– սուր շնչառական վարակներով հիվանդություններ, դրանցով երկարատեւ հիվանդ մնալ կամ հաճախակի հիվանդանալ
– երկարատեւ սթրեսային վիճակ
– անցանկալի մարդկանց հետ շփում
– բացասական ինֆորմացիայի հոսք, լուրեր, ֆիլմեր, ինտերնետ
– հաճույք չբերող միապաղաղ աշխատանք
– պարզ բաներով ուրախանալու անկարողություն:
Ինչպե՞ս լիցքավորվել էմոցիոնալ էներգիայով: Դրա համար անհրաժեշտ են դրական հույզեր, բայց չափի մեջ, քանի որ դրական գերշատ հույզերը նույնպես կարող են վնասակար լինել: Դրական հույզեր կարելի է ստանալ ամենատարաբնույթ ու նույնիսկ ամենահասարակ թվացող բաներից. հանդիպումներ ընկերների հետ, զբոսանք մաքուր օդում, ստեղծագործական որեւէ աշխատանք եւ այլն: Կարեւոր է, որ դա ուրախություն հաղորդի: Այն դեպքում, երբ ֆիզիկական էներգիայի հետ էլ ամեն ինչ կարգին է, դուք կստանաք էմոցիաներ, որոնք կլիցքավորեն եւ կսթափեցնեն:
Հոգեկան էներգիա. հանգստություն, միայն հանգստություն:
Ոգու ուժը եւ առաջ գնալու խթանն ամրացնելու համար մարդուն անհրաժեշտ է հոգեկան էներգիա: Դրա բացակայությունը հանգեցնում է տհաճ ախտանիշների հանդես գալուն: Իսկ ուժերի անկումն ու ինչ-որ բան անելու ցանկության բացակայությունը սառցաբեկորի միայն վերեւի մասն են: Վատթարագույն դեպքում կարող են լինել.
– ներքին լարվածության անընդհատ զգացողություն
– վախերի զարգացում, դեպրեսիվ վիճակներ
– կյանքի տարբեր ոլորտներում խնդիրների առաջացում
– քրոնիկ հիվանդությունների առաջացում կամ զարգացում:
Հոգեկան էներգիան օգնում են բարձրացնել հոգեկան ինքնակարգավորման մեթոդները, մեդիտացիաները, հոգեթերապիան, յոգայի կամ այլ մարզաձեւերի պարապմունքները: Իսկ հավատացյալները սփոփանք են գտնում աղոթքների եւ եկեղեցական արարողակարգերի մասնակցության միջոցով:
Պետք է հիշել, որ էներգիայի մեկ տեսակի վրա աշխատելով վերականգնվում են նաեւ մյուսները: Եթե ֆիզիկապես հոգնած եք, զբոսնեք մաքուր օդին: Այդ ընթացքում կհանգստանաք եւ կլրացնեք ֆիզիկական էներգիան, կստանաք դրական լիցքեր եւ թարմ ուժեր հետագա գործունեության համար: Սոնյա ԱՎԱԳՅԱՆ